राजकुमार लामा
नेपाली कांग्रेसको केन्द्रीय कार्यसमितिको सोमबार देखी जारी बैठकमा महामन्त्री गगन थापाले व्यक्त गरेका केही शब्दहरू सामाजिक सञ्जालमा भाइरल भए-तर ती केवल भावनात्मक प्रतिक्रिया थिएनन्, ती एक संयमित र मूल्यमा–आधारित राजनीतिक दृष्टिकोणका सूचक थिए।
फोहोर फैलाएर म आफैं फोहोरी बन्न चाहन्न।महामन्त्री गगन थापाको यो अभिव्यक्ति कुनै सामान्य प्रतिक्रिया होइन, यो अभिव्यक्ति आजको विषाक्त राजनीतिक पाटोको बीचमा मर्यादाको एउटा सशक्त हस्तक्षेप हो।
उनी अगाडि थप्छन् -बुबा भन्नुहुन्थ्यो: कसैले केही भने भने जवाफ दिनुपर्छ। तर आमा भन्नुहुन्थ्यो: फोहोर कुरा नगर्नु, त्यसो गर्यो भने आफैं फोहोरी भइन्छ। आज म आमाको कुरा मान्ने निर्णय गरेको छु।”
यी वाक्यहरू भावनात्मक त छन् नै, तर ती राजनीतिक अभ्यासमा संयमता, संवादमा गरिमा, र विचारमा आत्मसंयमका प्रतीक हुन्। गगन थापाले यहाँ केवल आमाको सल्लाह स्मरण गरेका छैनन्, उनले राजनीतिमा नैतिक उचाइका साथ उभिने सङ्केत दिएका छन्।
राजनीतिमा जवाफ होइन, दृष्टिकोणले जितिन्छ आजको राजनीतिक परिवेशमा, जहाँ आरोप–प्रत्यारोप, कटाक्ष, अपमान, र धुवाँधार वक्तृत्वशैलीलाई प्रभावशाली ठानिन्छ, त्यहाँ संयमित मौनता वा मूल्य–केन्द्रित भनाइ कमै देखिन्छ। यस्ता अभिव्यक्तिहरू राजनीतिमा कमज़ोरीका संकेत होइनन् – यिनले देखाउँछन् कि शक्तिमा पुग्ने दौडमा पनि मर्यादा हराउनु हुँदैन।
महमन्त्री गगन थापा राजनीतिक विचारमा प्रष्ट छन्, तर उनी संवादमा विवेक र परिपक्वता देखाउने नेताको रुपमा स्थापित हुँदैछन्। त्यो पनि त्यस्तो समयमा, जब सामाजिक सञ्जालले राजनीति नै प्रतिक्रियाको खेलजस्तै बनाइदिएको छ।
महामन्त्री गगन थापाले अन्त्यमा उच्चारण गर्ने “जय नेपाल” पनि महत्त्वपूर्ण छ। त्यो केवल नारा होइन, त्यो सन्देश हो -कि यो चिन्तन कुनै व्यक्ति वा दल सीमित होइन; यो राष्ट्रिय चेतना, लोकतान्त्रिक मूल्य, र नागरिक संस्कृतिको एक हिस्सा हो।
यस्ता भनाइहरूले राजनीतिमा वैचारिक असहमति र व्यक्तिगत अपमानबीच रहेर आलोचना गर्नु लोकतन्त्रको सार हो, तर त्यो गरिमासाथ गर्न सकिन्छ भन्ने सन्देश हो यो।
महमन्त्री गगन थापाले बोलेका यी केही वाक्य नेपाली राजनीतिमा संयम, मर्यादा, र सकारात्मक राजनीतिक संवाद को अभ्यास गर्न सकिने सम्भावना देखाउँछन्। लोकतन्त्र केवल चुनाव जितेर होइन, व्यवहारमा पनि जित्न सकिन्छ। महामन्त्री थापाको यो भनाइ राजनीतिको “मानविकीकरण” तर्फको सानो तर सशक्त पाइला हो।
मर्यादित संयम नै एउटा राजनेताको पहिचान हो। तात्त्विक र वैचारिक संघर्षमा उत्रँदा पनि जबान र व्यवहारमा मर्यादा कायम राख्न सक्ने नेता नै दीर्घकालीन रूपमा सम्मानित र प्रभावशाली हुन्छ। राजनेताका लागि अभिव्यक्ति स्वतन्त्रता र विरोध सहनशीलता उस्तै महत्वपूर्ण हुन्।”
राज कुमार लामाका ब्यक्तिगत बिचार हुन ।
